Тусгай хамгаалалттай газар нутгийн талаар олон улсын хамтын ажиллагаа жилээс жилд өргөжиж, цар хүрээ нь тэлэгдэж байна. Монгол орны төдийгүй дэлхийн хийгээд бүс нутгийн экологийн тэнцлийг хангахад чухал нөлөө бүхий байгаль, түүх соёл, шинжлэх ухааны онцгой ач холбогдолтой тусгай хамгаалалттай газруудыг олон улсын хүн ба шим мандлын нөөц газар /МАВ/ болон дэлхийн байгаль соёлын өв  жагсаалтад хамруулж, тэдгээрийн хамгаалалтыг сайжруулах, цаашид хамруулах үндэслэлийг боловсруулж холбогдох газруудад санал болгох зэрэг арга хэмжээ авч шат дараалалтайгаар хэрэгжүүлж байна.
НҮБ-ийн Шинжлэх ухаан, боловсрол, соёлын байгууллага /ЮНЕСКО/-ийн дэлхийн "Хүн ба шим мандлын нөөц газрын сүлжээ" /МАВ/-нд Говийн их дархан цаазат газар 1991 онд, Богдхан уулын дархан цаазат газар 1996 онд, Увс нуурын ай савын дархан цаазат газар1997 онд,  Хустайн байгалийн цогцолборт газар 2004 онд,  Дорнод монголын хээр тал нутаг 2005 онд тус тус хамрагдаад байна.
Дэлхийн соёлын болон байгалийн өвийн жагсаалтад Увс нуурын ай савын дархан цаазат газрууд 2003 онд, Орхоны хөндий 2005 онд бүртгэгдсэн бөгөөд Хөвсгөл нуурын байгалийн цогцолборт газар, Говь Гурвансайхны цөлийн эртний орд, Говийн их дархан цаазат газрын "А" хэсэг, эртний тахилгат Отгонтэнгэр уул, Богдхан уул, Бурхан халдун уул, Онон-Болжийн байгалийн цогцолборт газар зэрэг газруудыг үе шаттайгаар хамруулах чиглэлийг баримталж байна.

"Олон улсын ач холбогдол бүхий ус  намгархаг газар, ялангуяа усны шувууд олноор амьдардаг орчны тухай" Рамсарын конвенцийн хавсралт жагсаалтад Монгол Дагуурын ДЦГ 1997 онд бүртгүүлснээс хойш дараах 11 газар бүртгэгджээ.

Зүүн хойд Азийн тогоруу хамгаалах олон улсын сүлжээнд Монгол дагуурын дархан цаазат газар 1997 онд Зүүн хойд Азийн галуу, нугасны овгийн шувуудыг хамгаалах олон улсын сүлжээнд Тэрхийн цагаан, Өгийн нуурууд 1999 онд тус тус бүртгэгдээд байна.
Мөн хөрш зэргэлдээ орнуудтай хамтран хоёр болон гурван талын хил дамжсан хамтарсан дархан газруудыг байгуулж,нүүдэллэдэг амьтдыг хамтран хамгаалах асуудалд анхаарч байна.

Эрдэмтдийн судалгаагаар тус орны  ховордсон, устах аюулд ороод байгаа амьтан, ургамлын тархац нутгийн 40 орчим хувь нь улсын тусгай хамгаалалтад хамрагджээ.
Манай орон шиг байгаль цаг уур, нутаг дэвсгэрийн онцлог нөхцөлтэй улс гүрэн нутаг дэвсгэрийнхээ  30 аас доошгүй хувийг ямар нэг хэлбэрээр  хамгаалалтад авч аж ахуйн үйл ажиллагааг зохистой явуулсан нөхцөлд  экологийн тэнцвэрт байдлаа хангах боломжтой гэсэн шинжлэх ухааны үндэслэлтэй тооцоо бий.
Төрөл бүрийн ангилал, зохицуулалттай тусгай хамгаалалттай газар нутгийн нэгдсэн сүлжээ байгуулснаар  зөвхөн биологийн төрөл зүйлийг хамгаалаад зогсохгүй, доройтолд орсон орчныг нөхөн сэргээх, ховор, ховордсон амьтан ургамлыг өсгөн үржүүлэх, аялал жуулчлал  хөгжүүлэх бололцоо бүрдэнэ.