Байгалийн нөөц баялгийн менежментийн эрхзүйн үндсийг боловсронгуй болгон, байгаль орчныг хамгаалахад олон нийтийн оролцоог нэмэгдүүлэх бодлогын хүрээнд дараахь зорилтыг хэрэгжүүлнэ. Үүнд:
1. Агаарын тухай хуулийн шинэчилсэн найруулгын төсөл, Агаарын төлбөрийн тухай хуулийн төсөл, Ан агнуурын тухай, Аялал жуулчлалын тухай, Байгалийн ургамлын тухай хуульд нэмэлт, өөрчлөлт оруулах тухай, Байгалийн ургамал ашигласны төлбөрийн тухай хуульд нэмэлт, өөрчлөлт оруулах тухай, Байгаль орчинд сөрөг нөлөө үзүүлсний төлбөрийн тухай хууль, Тусгай хамгаалалттай газар нутгийн тухай болон Орчны бүсийн тухай хуулиудад нэмэлт өөрчлөлт оруулах тухай хуулийн төслийг УИХ-д өргөн барьж шийдвэрлүүлнэ.
2. Агаарын бохирдлыг бууруулах зорилгоор Улаанбаатарт ахуйн зориулалтаар түлшинд ашиглах түүхий нүүрсний хэрэглээг 12-оос доошгүй хувиар бууруулах, коксон түлшний хэрэглээг нэмэгдүүлэх, ногоон байгууламжийн талбайг өргөжүүлэх арга хэмжээг хэрэгжүүлнэ.
3. Орчны бохирдлыг бууруулах эдийн засгийн хөшүүргийг боловсронгуй болгож, ахуйн болон аюултай хог хаягдлыг ялган ангилах, цуглуулах, устгах системийг боловсронгуй болгоно.
4. Гадаргын усны менежментийг боловсронгуй болгож, гол мөрний урсацад тохируулга хийх, хуримтлагдсан усны нөөцийг шилжүүлэн ашиглах “Орхон говь” төслийн судалгааны ажлыг эхлүүлэх бэлтгэл ажлыг хангана.
5. Зарим тусгай хамгаалалттай газар нутгийн хортон шавж, өвчинд нэрвэгдсэн ойд ойн аж ахуйн арга хэмжээ явуулж ард иргэдийг модон түүхий эдээр хангах арга хэмжээ авна.
6. Уул уурхай, ашигт малтмал ашиглахад байгаль орчинд үзүүлэх сөрөг нөлөөллийг багасгах байгаль орчны хяналтын механизмыг боловсронгуй болгоно.
7. Алтай, говийн бүс нутагт цагаан зээр, тарвага, идлэг шонхор шувууны тархац, нөөцийг тогтоож, хамгаалах арга замыг иргэд, нөхөрлөлийн оролцоотойгоор хамтран хэрэгжүүлнэ.
8. “Аялал жуулчлал” үндэсний хөтөлбөр, Аялал жуулчлалын маркетингийн стратеги, аялал жуулчлалын эко стандартуудыг боловсруулан мөрдүүлж зочид буудал, жуулчны баазын үйлчилгээнд байгаль орчинд халгүй техник, технологийг нэвтрүүлнэ.
9. Байгаль хамгаалагчдыг дэмжих жилийн хүрээнд тэдгээрийн чадавхийг бэхжүүлэх сургалтын хөтөлбөрийг хэрэгжүүлж, улсын тусгай хамгаалалттай газар нутгийн хамгаалалтыг сайжруулна.